البوري

البورى من انوع السمك التى تعيش فى مجموعات كبيرة و يطلق بعض الصيدين على البورى حسب حجمة اسماء منها البوري الصغير: جران , البوري المتوسط: بوري ,البوري الكبير: كمبوت

 يتواجد البورى عادة في المياة متوسطة العمق يعني من 3 ل 6 متر تقريبا
موسم صيد البوري : يتواجد البورى طوال العام و لكنة بيقل جدا في الصيف والشتاء يعني لما المية تسخن قوي ولما تبرد قوي

طرق صيد البوري
البوري عادة بنصطاده بالبوصة العادية وده بيكون بطريقتين
1- الصيد بالفلة

البورى من الاسماك الحساسة جدا علشان كده لازم نختار وقت الصيد وعدة الصيد المناسبة صيد البوري يكون بهدوء شديد ولو بتصطاد بالنهار لازم تختار مكان لا ينعكس الظل المترتب عن خيالك على المية يعني لا تجعل الشمس في ضهرك علشان ظلك مايجيش على المية وعلشان كده انسب وقت لصيد البوري بيكون من بعد المغرب لغاية الفجر .
الشعر الاساسي مش اكتر من 25
شعر الفروع من 15 ل 20
السلاح 25 ل 20
صيد البوري بالفلة يكون طعمك عجينة ومش اي عجينة لازم تكون طرية .
بالنسبة لشعر الفروع بيكون قصير يعني فرع 25 سم والتاني 15 او 20 سم
العمق اللي بتصطاد علية يكون نص عمق المية
اطعم العجينة وارمي خطاء يرتكبة جميع الصيدين احنا قلنا ان البوري حساس جدا لاي حركة غريبه لو انت رميت زي ما بترمي يبقى مش حتلاقي ولاسمكة بورى في المية يبقى احنا لازم ننزل الفلة بالراحة في المية و توكل على الله .
البوري مش بياكل زي باقي السمك البوري فيه ناس بيقولو انه بيلحس الطعم وده طبعا مش صحيح لانه بياكل ولكن لان بقه فتحته لفوق وبقه صغير جدا فبيسحب من الطعم حتت صغيرة جدا وعلشان كده لما بياكل بنلاقي ان الفلة مش بتغمز
بنلاقي ان الفلة بتتحرك حركة بسيطة احنا بنقول انه بيخنق الفلة لما السمكة تاكل معاك اوعى ترد فيها جامد وده لسببين اولا لاننا قلنا ان اي حركة غريبة حتخلي السمكة تفزع وثانيا لان بق البوري ضعيف لو اديتة واحدة جامده شوية حتلاقي بقة بس هو اللي طالع .

2- صيد البوري بالربع (المشنقة)
شعر اساسي 25
شعر فروع 15 ل 20
الصيد بدون فلة
الشعر الاساسي طولة نص عمق المية
السلاح كبير شوية يعني 6 او 5
وبيكون عدد من 5 ل 7 سنانير بنعمل 3 طولهم حوالي 10 سم والباقي طولهم حوالي 5 سم , ونحط رصاص شريط حوالين مكان توصيل السنانير ,الصيد بيكون بعجينة ناشفة , بتحط العجينة على الرصاص وبتنزلها المية بالراحة لغاية ما اللبلوب بتاع البوصة يوصل اول المية في الطريقة دي البوري هو الي بيوقع نفسة وعلشان كده سموها المشنقة. وممكن نستخدم طعم تاني مع الطريقة دي وهو السردين تشيل راس السردينة وتفتحها من بطنها وتعلقها على السناير يعني تخلي السنانير كلها جوة بطن السردينة وتغرزها فيها من جوة .

 صيد البوري بالبوصة والماكينة
الشعر الاساسي 40
شعر الفروع 30 او 35 وده لازم لان السمك اللي بيضرب عليك سمك تقيل
السلاح بيكون حوالي من 15 ل 25 سنارة نمرة 20 او ممكن 18
بنربط السنانير كلها طول واحد اللي هو حوالي 15 سم
وكلهم يتوصلو في الشعر الاساسي من نفس المكان اللي هو فوق الرصاصة بحوالي 30 سم
الطعم بيكون عيش بلدي اسمر
بنقطع الرغيف شرايط عرضها حوالي 5 سم وبنلفه على شكل اسطوانة بحيث يكون الجزء الداخلي للرغيف هو اللي برة , ونجيب استيك عادي من بتاع الفلوس ده ونثبت بيه العيش على الشعر الاساسي جنب وصلة الفروع ,ونجيب السنانير كلها ونغرزها في العيش بشكل عشوائي ونرمي ونسيبها , وان شاء الله حتلاقي البوصة دي بتعمل زلزال تعرف ان معاك بوراية لا تقل عن اتنين كيلو ونص او تلاتة كيلو .

طريقة تحضيرالعجينة لصيد البوري :-
اولا العجينة الطرية
كوب دقيق – مية حسب الاحتياج - سكر
حنحط الدقيق على النار ونقلبة لغاية ما يسمر ونضيف له معلقة سكر صغيرة مش مليانة وبعد كده نضيف المية شوية شوية لغاية ما تلاقي القوام بقى متماسك بيبقى قوامها عامل زي قوام الشحم اللي بنشحم بيه .
سيبها تبرد وحطها في علبة بس لازم لاحظ ان تطعيم العجينة الطرية عايز خبرة لانك لازم تطعمها بفمك بمعنى انك بتاخد حتة عجينة صغيرة فى فمك وتحط السنارة في فمك وتلف العجينة على السنارة بلسانك فالغلطة حتلاقي انك اصطدت نفسك . 

ثانيا العجينة الناشفة

ودي بتكون للصيد بالربع وهي عبارة عن عيش بلدي عادي جدا وبنبلة ونعجنة بادينا ونسيبة جنبنا في الشمس او الهوا ولو احتاج مية تاني نديلة وده تطعيمة ساهل جدا لانك بتاخد حتة وتحط الرصاصة في نصها وتلف العجينة عليها بايدك زتاكد عليها زي ما تكون بتعمل كفتة .

لصيد البوري يجب ان تنفذ بعض الاجراءات وهى تحضير المرمى , وهو انك لازم تجمع السمكة الاول وده بيكون بالتزفير ,والتزفير بيكون بعيش مبلول في جردل مية لغاية ما يفرول وتعملة كور صغيرة وترمية في المية ,والتزفير للبوري شئ اساسي لان البوري بيتجمع على ريحة العيش في المية وكمان لازم تلاحظ ان مع كل سمكة تطلعها لازم ترميلك كورة او اتنين تزفر بيهم علشان تثبت السمكة تحت منك التزفير بيكون قبل ما تبتدي تصطاد بفترة ممكن توصل ساعتين او تلاتة ويكون متواصل علشان تقدر تجمع اكبر كمية من البوري . 

 

 

 

 .

تعليقات (16)

  • mahran422

    اتمنى من هذا الموقع الجميل ان يرسل لى اهم الاسماك المتداوله فى السوق السعودى بالصور والفوائد الصحيه لا كل هذه الاسماك للمساعده فى عملى وشكرا جزيلا.

    رد
    • Catch Fish

      أخى العزيز فى القريب ان شاء الله سوف نفرد تدوينة خاصة عن الاسماك بالسعودية و نتمنى ان تساعدك هذة التدوينة .

      رد
  • kgfox

    ممكن رسم توظيحي لهاتين الطريقتين
    صيد البوري بالربع (المشنقة)
    صيد البوري بالبوصة والماكينة

    رد
  • علي عثمان

    السلام عليكم ورحمة الله و بركاته

    ارجو ان تضعوا صور السمك المراد الشرح عنها وليس رسمة كاريكاتورية لان الاسماء تختلف في عالمنا العربي.

    مع الشكر الجزيل

    رد
    • Catch Fish

      و عليكم السلام ورحمة الله و بركاتة
      الاخ العزيز على عثمان نشكرك على هذة اللفتة الطيبة و لكن نحن نقوم بوضع صورتين الاولى الصغيرة(كاريكاتورية) و عند قراءة موضوع السمكة ستجد صور لاسماك التى نتحدث عنها .

      رد
  • ياسر عليوه

    اخي العزيز بارك الله فيك علي هذه المدونة وعلي المعلومات الجديدة والمفيدة في صيد السمك وننتظر منك المزيد بارك الله فيك ملحوظة علي فكرة طريقة الشرح بسيطة وجميلة وياريت تكون اكسر بساطة ومصحوبا با الصور ومشكور يا غالي علي هذا المجهود الرائع

    رد
  • محمد ابوالنجا

    ممكن اشوف رسم المشنقه ب 5 او 7 سنانير هيكون شكله ايه ولكم جزيل الشكر

    رد
  • مصطفى منتصر

    ا/ محمد ابو النجا
    للاسف صاحب المدونة الموقر لن يستطيع الرد على سؤالك لانه قام بنقل جميع معلومات ومحتويات المدونة من مواقع اخرى دون استئذان من اصحاب المواضيع
    وهو للاسف لن يجد رسم توضيحي لطلبك لانه لا يعرف ما هو بالضبط ولم يجد في المواقع الاخرى رسم له

    ونداء لصاحب المدونة وكان لنا حوار سابق في احد المنتديات التي بها المواضيع التي تم الاقتباس منها دون اذن مسبق
    اذا اردت ان تكون مفيدا للناس فاعلم ان المصداقية مطلوبة
    وانا لست ضدك
    بالعكس
    انا مهتم جدا بمدونتك لان بها معظم خبراتي الشخصية (في شكل مواد اساسية للمدونة)
    لكن اطلب المساعدة ستجد من يساعدك
    لا تقتبس مجهود الاخرين دون ذكر ذلك
    والله الموفق لك ولنا

    رد
    • Catch Fish

      الاستاذ مصطفى منتصر
      مرحبا بك فى مدونتك مدونة صياد السمك و مرحبا بكل اهل الكويت فى المدونة و ان كنت من متابعى المدونة ففعلا عند نشر الموضوعات من مواقع اخرى اولا بيكون من ارسل الموضوع لنشرة صاحب الموضوع و نحن (انا) اقوم بنشرة فى المدونة منسوب لصاحبة و ليس لى و ارجوك قبل ان تجذم بشئ تجهلة “للاسف صاحب المدونة الموقر لن يستطيع الرد على سؤالك لانه قام بنقل جميع معلومات ومحتويات المدونة من مواقع اخرى دون استئذان من اصحاب المواضيع
      وهو للاسف لن يجد رسم توضيحي لطلبك لانه لا يعرف ما هو بالضبط ولم يجد في المواقع الاخرى رسم له
      ” ان تتاكد من المقولة و اتمنى ان تمدنا بقائمة بموضوعاتك (خبراتك الشخصية ) المنشورة فى مدونة صياد السمك لكى يتسنى لى مراجعتها و شكرا
      محمد الفحام
      صاحب مدونة صياد السمك

      رد
    • Catch Fish

      تركت تعليقا مفاده أن المقالات من خبراتك الشحصية ، وبدلا من مشاركتنا بهذة الخبرات ، تركت تعليقا سلبيا. يا مصطفى منتصر ، ضللت الطريق وليست هذه المدونة لك، قراء مدونة صياد السمك يتعاونون معا و يتبادلون الخبرات ويأخذون بأيدي بعضهم البعض وأرجو أن تحرمنا من تعليقاتك السلبية.
      اسرة تحرير المدونة

      رد
  • محمد ابو النجا

    اشكرك يااخ مصطفي

    رد
  • محمد

    عايز اعرف اماكن صيد البورى فى الاسكندرية وارجو الرد

    رد
  • مدني هنتي

    لمادا لا نترك القال والقيل جانبا ونهتم بتطوير هده المدونة وتشجيع صاحبها على العمل أكتر لكي نكون قي مستوى التنافسية . لنتعاون اصدقاءي الصيادين العرب فنحن بأمس الحاجة لدالك

    رد
  • gebasy atta

    المدونة رائعة و واعتبر نفسى من المهتمين بها
    وارى ان من يعتبر نفسه مصدر خبرات
    ان يشاركها مع الجميع او يصمت
    ومن كان متكلما
    فليقل خيرا
    او ليصمت

    رد
  • البحر الاحمر

    مشكله البورى فى ان حجمه صغير جدا

    رد

اكتب تعليق

الصعود لأعلى