انت هنا : الرئيسية » معلومات عامة » اماكن صيد الاسماك في مصر

اماكن صيد الاسماك في مصر

اماكن صيد الاسماك في مصر

كاتب الموضوع :الاستاذ / عاطف السيسي

1- منطقة محاجر ابو زعبل سمك بلطى كفافى سريع وقرموط بحجم كبير و السمك هناك كبير و المياة عميقة جدا جدا جدا من 7 متر و فى حتت تيج 12 متر دة كدة و بتصقط امامك وليس بالداخل .
2- منطقة دير الميمون قبل بنى سويف وبعد الكريمات جميع الاسماك وخاصة الرعاد
3- الترعة التى امام البلاجات فى فايد قرموط سريع جدا
4- ترعة الصحافة تروح لها من ابو زعبل تركب عربة باتجاه بلبيس وتنزل الصحافة وتمشى شوية فى الزراعة بلطى سريع5- ترعة معرفش اسمها تروح لها من شبين تركب عربية بتقول الشرابية وممكن تنزل الشرابية او كفر عبد النبى بلطى حلو
6- ترعة القلج خلف السجن بلطى كفافى
7- أبو الخاو على الهدار طريق الخطاطبة كفر الزيات جميع أنواع السمك بلطي في النهار (ريم) وف الليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
8- المنصورية و النجيلة ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
9- كوم شريك ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
10- قناطر بولين (كفر الزيات ) لطش من على الغلة طوال أيام العام
11- فى منطقة فى حلوان اسمها ركن فروق (و هى مرسى للسنادل الخربانا) اخر طريق الكرنيش فى اتجاة حلوان لحد متلاقى مصنع لمواسير البترول (طعم و عجين ) حداف و غماز ( فلاش باشا )
12- القناطر هتروح القناطر و تسئل عن سجن القناطر و انزل بعدها عند المطافى و اول يمين قبل الكبرى الى علية الكامين تدخل يمين لحد اللسان و انزل هتلاقى جزر على فكرة الدوار حجارة (طعم ) غماز
13- غمازة الصغرى بعد حلوان على الكورنيش هناك ثلاثة ترع موازيين… آخر ترعة أدخل يمين حتى تجد هيش… بلطي جميل أحمر كفافي حجاري بالطعم الموسم من شهر 5 لكن ممكن يشتغل من4
أولا – البحري :
14- ابتداءا من المناشي – منشأة القناطر – ساعات بيقع فيها غلطات محترمة تشتغل صباحا ( بالريم ) و مساءا بالطعم و لو الجو هادي باليل و مافيش زحمة ممكن ترموا حداف بسن 6 أو 5 و طعم محترم ( معنكب ) و تلعبوا على البياض.
15- اتجاه الباجور : بالترتيب كدة : صروة – أو السبع روس و ده دور حداف و غماز
16- بير شمس – و ده دور غماز بالأساس و ساعات الحداف بيشتغل فيه لكن عيبه إنه بعيد شويه
17- الباجور نفسها – و فيها عدة أدوار على الحجر على كيف كيفك بلطي و رعدات
18 – اتجاه نكلا : نكلا نفسها – ولكن أنا ما بفضلش الصيد فيها أولا علشان المية هناك حامية جدا و ما ينفعش فيها غير الحداف و من على البغال مش من البر.. و ثانيا .. علشان الريحة..!!!!
19- أبو غالب : و فيها دورين حلوين جدا عند المجزر و تقدر تشتغل فيهم غماس و حداف و البلطي بتاعها يفرح
20- الحاجر : و هي بعد أبو غالب على طول و فيها كذا دور و أنا بفضل دور المدرسة و سمكها زي أبو غالب تمام
21- الخطاطبة : وهو دور مسلي سواء عند الجامع اللي على الطريق أو قدام على الحجر… و لكن عيبه إن سمكه صغير و الراي فيه كتير ( بالمناسبة الدور ده في يناير تشيل منه تعابين زي ما إنت عايز(
22- كفر داود – دور ريم و طعم و سمكته أكبر شوية من الخطاطبة بس المية فيه حامية و علشان كدة هو دور بالأساس غماس.
23- الدلنجات و دمشق – زي كفر داود بس سمكتهم أكبر و لكن مشوارهم أبعد بكتير.
24 – اتجاه قبلي : الصنادل – دار السلام – و ده مكان قدام شرطة المسطحات و بنروحله بالمعدية و ما تستهونوش بالمكان ده لأن سمكته لو اشتغلت بتطلع منه سمك محترم خصوصا على الحداف .
25- كوتسكا – دور تسلية ( لتعليم الصيد ) بصراحة ما شفتش منه خير.
26- الإخصاص : دور حلو جدا بس لو المية واطية في النيل و بناخد بلطي حلو منه.
27- ميت القايد : دور رائع لصيد الريم صباحا و الطعم في الليل ( الحداف ما ينفعش علشان الحجارة هناك كبيرة و المية سريعة(
28- نزلة عليان (غمازة) – و من هنا نخش على الجد – يعنى عدة نضيفة و خيط جديد و سنون محترمة و ده دور بلطي و رعدات و شيلان و بياض و أنوم.
29- جرزا – زي نزلة عليان بالظبط و هي في الجهة المقابلة منها.
30- من جرزا إلى بني سويف ممكن تعد أكثر من 100 دور على الناحيتين و معظمهم أدوار تقيلة و زي الفل
ودا شرح من صياد محترم جدا للقناطر و الادوار التمام جزاة الله كل خير:
ان القناطر صعب تلم بكل ادوارها كلها لان القناطر فيها فرع رشيد ودمياط والتفرع بيبقى في القناطر وفيها حوالي 4 رياحات(المنوفى ، التوفيقى ، البحيري , الناصري) من اجمل الرياحات قي القناطر المنوفي ميته شديدة جدا فالحداف افضل الطرق وارضه حجارة
الطعم / دود الارض عادي وعنكبوت للبلطي والراي و البياض و الانومة و الدقماق وغلطات شيلان , العجينة للراي و للبني والبلطي و غلطات مبروكة وممكن تطعم للمبروكة من البوص النامي على الجوانب بس تكون حاضرة في المية
الرياح البحيري من الرياحات القوية وهي الممتدة على طريق الخطاطبة وفكرته نفس فكرة المنوفي
والرياحات في القناطر كلها او اغلبها ميتها شديدة لان القناطر هي منطقة الهاويس لهذة الرياحات فبتبقى المية في بداية إندفاعها اما التوفيقي والناصري فمعرفش عنهم اي معلومات بصراحة
فرع رشيد في القناطر فحدث ولا حرج فية عندك ياسيدي الكوبري القديم ودا في الصيف شغال طعم وعجين … وطول السنة تقريبا التشميط كويس
الجرف بين الكبريين ودا دور ممتد بطول المناشي ويقع ما بين الكوبري القديم والكوبري الجديد ودا طعم وريم حلو جدا في الصيف وتشميط طول السنة تقريبا والسمك بلطي وبياض وانوم وقليل جدا من البني وشيلان نادرة جدا
نطلع بعد كدة على الكوبري الجديد والرمي من فوق الكوبري ناحية قبلي غير بحري الكوبري قبلي هيبقى زي الجرف والكوبري القديم
اما الرمي من من نفس الكبري بس على بحري بكون على المشاية الملحقة بالكبري
من فوق العيون مباشرة ودي بتكون ميتها شديدة جدا جدا فية مواسم المبروكة بتاكل من عليها في المية الحامية بالطعم (عنكبوت) او ريم او البوص (قصب الفار) وهو البوص النامي على حواف النيل
المواسم دي عادة بتكون في شهر 6 , 7 ,8
الطعم التاني المميز العجينة بس دي عايزة حرفنة شوية في تجهيز العجينة وحرفنة في الصيد بيها
علشان العجينة ما تسيبش من السنارة من شدة المية
والعجينة دي من الطعوم السحرية إللي كتير من الناس بيتجاهلها بسبب صعوبة الصيد بيها
انواع السمك الراي – البني – القراميط – البياض – الشيلان إن وجدت و البلطي والمبروكة تأكلها لكن بالصدفة ويفضل في حالة توجية الطعم لصيد البياض تزفير العجينة بوضع زفارة سمك عليها لانها جاذبة للبياض
الطعم الدولي (مصارين الدجاج) ودي للقرموط رقم واحد وصدف ثعبان في الشتاء وصدف مبروكة
العنب البناتي للقراميط والبني في شهر 7,8
والصيد بالسمك زي انك تطعم راية صغيرة جدا او جلمانة ودي ممتازة للبياض والشيلان والرعاش
القرموط والبني الكبير جدا بيدخل عليها بس دي عايزة يكون معاك سنارة تطعمها وتنساها بس الغلطة فيها بإذن الله بحاجة محترمة زمان كنا بنجيب بيها قشر بياض بس دا إنقرض
ننزل من فوق المشاية على الجرف البحري ودي ادوار مبروكة ممتازة بس لما المية تكون عالية وبلطي في موسم الريم , وبالطعم في الشتاء التعبان بياكل كويس وادوار القراميط كتير نظرا لوجود البوص ودي صيدها بالطع الدولي
نطلع بعد كدة على منطقة السد او الشلالات ودي منطقة ممتازة لهواة الصيد بالفلة (الغماز) بالريم وبيقع فيها بلطي محترم بس لازم مركب وتنزل على الهدار او الشلال او كما نسميها في القناطر الدشم والراي والبني بياكل كويس في الصيف على العجينة والطعم …..والمبروكة والدقماق والبياض والتعبان و الشلباية كل الاسماك دي هناك بس انت ورزقك ..لانهم مبيكلوش بالساهل وعايزين صبر وحرفنة
واحب اضيف بعض الاماكن
1-بنها ,برشوم,الطريقة حداف الطعم دود ارض الاسماك انوم وبياض وممكن غماز ادوار حجر بلطي ورعاش كتير
2-ترعة الاسماعيلية ,سرياقوس علي الهويس الجديد حداف جميع انواع السمك والطعوم ,البني كتير جدا
3-التحرير ,عزبة الباشا غماز بلطي ورعاش وبياض على الوش الطويل
4-القنطرة غرب ,الرياح ,ترعة ابو خليفة الطريقه حداف و غماز بياض رهيب بالعلق,وبلطي
5-الشرقية ,السعديين ,ترعة ابو الاخضر حداف بياض وكرور ولبيس وانوم وبني
6- شبين القناطر ترعةالشرقاوية و الحسنية بلطي علي الغماز وقرموط , نهارا ريم وليلا طعم ولهواة السبلة والسمم (مالهاش حل)
ووادي الريان يقع غرب مدينه الفيوم ويبعد عنها حوالي 20ك واحلي مكان للصيد هو
البحيره الاولي وبالتحديد عند مدخل المياه اي المجره والطعم هناك بيكون سمك صاحي
واحلي طعم هو سمك البوري وده هتجيبه تشميط من المجره ويليه ابو رياله
والبني وابو رياله واضعف طعم هو الِشر
وأحب أضيف من عندى مكان خلف مطار النزهه بالأسكندريه إسمها العفاريتى وفيها سمك جامد

تعليقات (32)

  • اسامه ابراهيم

    والله كتر خيرك بس معليش الاماكن هذه للبلطى وسمك المياه العذبة ولكن كل هذه بدايات الصيد تعالى ياخى الى الاسكندرييه او بلطيم او مرسى مطروح اوراس البر او دمياط او بورسعيد او الاسماعليه او السويس وانت نازل على البحر الاحمر هذا هو الصيد تتعامل مع سمك تحس بمعنى الصيد
    ولكن على العموم شكرا جزيلا على معلوماتك

    رد
  • كامل حجازى

    ششكرا على المجهود الرائع دا بس احنا عايزين اماكن الصيد فى السنة الحديثة مش من عشر سنين فاتو ياريت
    ولو فيها اى ازعاعج نأسف للازعاج
    ولو ممكن كمان نعرف الصيد على الشاطئ البحر الاحمر وميكنش بها اى عوائق ابقى من الشاكرين لسيادتكم انتو الاخوة لكم جزيل الشكر

    رد
  • محمد

    السلام عليكم ورحمة الله وبركاته يا اخى كل معلوماتك قيمه بس فى حاجه عاوز اصححها لك ان البلاد ال انت قلت عليها ابو الخاوى كفر الزيات معلمات مش صحيحه علشان النا متهش ابو الخاوى كوم حماده كوم شريك كوم حماده النجيله كوم حماده حتى الخططبا كوم حماده كل دول على خط كوم حماده وكلهم تبع مركز ومدينه كوم حماده وده للعلم علشان محدش يسال فى كفر الزيات على مواصلات للبلاد دى وشكرا

    رد
  • عصام احمد

    كل المعلومات قيمة جدا لكن مفيش اي حاجة عن النوبارية او الترع الموجودة علي الصحراوي من السادات ال العامرية

    رد
  • اسامه الامام

    اقترح خدمة من المدونة التى تجمع هواة الصيد و هى ان يبلغها الهاوى الذى يجد صيد وفير فى مكان و تبلغنا المدونة فى حينه على البريد الالكترونى للهاوى و نلتقى فى هذا المكان لنتعارف و نسعد بوقت سعيد و هذا اقتراح لابداء الراى و لكم الشكر

    رد
    • Catch Fish

      الاخ اسامة الامام اولا اشكرك على تفاعلك مع المدونة و نشكرك ايضا على هذا الاقتراح الجميل و ان شاء الله سوف نقوم بتنفيذة فى القريب العاجل
      ادارة مدونة صياد السمك

      رد
  • سعيد المصرى

    انا احب انا اشكركم جميعن على كل الاماكن الجمدا دى ونفسى اعرف طريكت العجينا بس تكون بى بصاطا

    رد
  • اسامه الامام

    اولا اشكر الاخ عاطف السيسى و اضيف ان من افضل اماكن صيد النيل منطقة الشادر بجوار الاسماعيلية لكل اسماك النيل و تتميز بكثرة ادوار الصيد فى ترع و مصارف هذة المنطقة و عيبها وعورة طرقها

    رد
  • بوتشر

    فعلن انت صباد محترف

    رد
  • mosytafa

    انا نفسى اروح الاماكن دى بس للاسف بعيدة اوى احنا عيشين فى الهرم ازاى اوصل مش هعرف

    رد
    • محمد عوان

      ملحوظه هااااااااامه جدااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا
      ياجماعة ممكن اتشرف بدعوة حضراتكم لرحلة صيد الي البحر الفرعوني شهرته (الاعمي) قلتي الكبرى بمركز الباجور -المنوفيه
      المياه راكدة الصيد بالغماز
      السمك حلو جدا بلطي يصل الي 1 كيلو
      بياض كبير 2-3-4-5-6 كيلو واكثر
      قراميط
      مبروكه 3-4-5-6-7-8-9-10 واكثر حتي 25 كيلو
      المواصلات من المؤسسه او موقف عبود تركب عربيات منوف وتنزل قلتى على كبري بنت الباشا
      الاجره 5 جنيه او تركب عربيات الباجور الاجره 5 جنيه وتنزل الخضرة (الكرته) وتركب توكتك ب3جنيه وتنزل قلتى على كبري بنت الباشا زمن الوصول من المؤسسه او موقف عبود ساعه اوساعه ونصف
      اي مكان في البحر ممكن تصطاد فيه
      انا محمد عوان من كفر قلتى لاستعلام عن اي شئ 01064465211

      رد
  • عمرو ابو حبيبة

    ربنا يكرمك يا محمد ياريت والله الاقتراح ده حلو جميل و انا هكون مبسوط والله حاولت الاتصال بك و لكنك لم ترد رقمى 01004705018

    رد
  • عمرو ابو حبيبة

    اقتراح الاستاذ اسامه ده جميل جدا ياريت اداة الموقع تعمل حاجه زى كده و تبلغنا حتى لو فى مصاريف ممكن ندفع بس الواحد محتاج منكم الخبرة خصوصا انى لسه فى البداية و انا بحب الصيد جدا و شكرا ليكم على الموقع الجميل جدا جدا ده و ياريتنى كنت عرفته من زمان بس الحمد لله و الف شكر لكل القائمين على هذا الموقع

    رد
  • peter sabri

    طيب انا من شبرا مصر ومش عارف مكان اصطاد فيه على النيل مممممكن اقرب مكان ليا

    رد
  • محمد سليم

    الشكر موصول الى الاستاذ محمد عوان من كفر قلتى على استضافتنا يوم الجمعه القادم عنده فى الباجور على البحر الفرعونى وساوافيكم بأخبار المنطقه

    رد
  • tamer youssef

    السلام عليكم احييكم على هذا المجهود الرائع بس من فضلكم افيدونا عن اماكن للصيد بمحافظة كفر الشيخ او قريبا منها وجزاكم اللة خيرا

    رد
  • tamer youssef

    واية افضل طعم للسمك البلطى

    رد
  • علاء مجدي

    انا عاشق للصيد يا جماعه ونفسي في حد يعل رحلة جماعيوانا معاكو ورقمي 01205871135

    رد
  • هاني

    ممكن إفادة عن أماكن صيد المالح أنا في العاشر من رمضان وكنت هاوي صيد قديم قبل الانتقال من الصعيد للعاشر من رمضان ونفسي في معرفة أقرب أماكن الصيد ومعايا موتوسيكل حالته كويسة ونفسي في عود صيد ابن ناس وشنطة أرجو الافادة ضروري علشان دي هوايتي الوحيدة 01142078801

    رد
  • مصطفى جامع

    اولا احب اشكر كل القائمين على الموقع الجميل دة
    وكمان بشكر كل الصيادين المتفاعلين فى الموقع
    انا من المحلة الكبرى وبحب الصيادة جدا وبروح اصطاد كتير فى كفر الشيخ عند المزارع اللى عند طرق 67 و71
    فى ترع ومصارف كتير بين المزارع بروح اصطاد عندها والحمد لله ربنا بيكرمنى بس كنت عايز اعرف اماكن تانية
    قريبة منى شوية لان المسافة كبيرة والمواصلات مش بتكون موجودة دايما
    فياريت لو حد يساعدنى الاقى اماكن قريبة منى اكون شاكر جدا لية وممكن اطلع معاة رحلات صيادة

    رد
  • محمد مأمون

    الله ينور يا باشا شغل عالى عالى عالى
    حضرتك نسيت التوفيقيه
    والاخ اللى بيسأل على ادوار مش من 10 سنين … كل اللى الاستاذ تفضل وقاله مش من عشر سنين ولا حاجه ادوار كفر الزيات كلها شغاله ما شاء الله وبتدى للصياد الحريف والصياد اللى على قده كمان

    رد
  • حسام عكاشة

    يا جماعة فى أماكن كثيرة جداً فى الاسكندرية و السخنة و وادى الدوم شغالة صيف و شتاء و الطعم مكريل مقطع عقل
    و مفيش عوائق
    و ده رقم التيلفون 01061247778

    رد
    • ابراهيم انور عجلان

      حسام ممكن اعرف الصيد فى خليج وادى الدوم بتصريح من الحدود ولالا وعاوز اعرف اماكن
      اماكن تانى للصيد فى السويس لو عندك معلومات

      رد
  • طارق

    كيفية الصيد بالريم

    رد
  • ابراهيم انور عجلان

    انت جايب الترع والمصارف اللى فى مصر كلها ومقولتش حاجة عن اماكن الصيد فى البحر الاحمر او امتوسط او خليج السويس والعقبة

    رد
  • كريم صبرى

    انا عاوز ننظم رحله صيد انا معايا سياره خاصه وده رقمى 01210330118 وكل عده الصيد بتعتى جازه وبروح اماكن كتيره بس انا بحب اكتسب خبرات

    رد
  • محمد الحجازى

    اللى نفسه يطلع رحلة صيد فى السخنة ويستمتع يكلمنى 01282801589
    مارينا وادى الدوم

    رد
  • ايهاب بيبو

    السلام عليكم انا ايهاب بطلع رحلات صيد فى البحر جزيره نيلسون وجزيره جريشه بالنسبه للبحر وكمان جزيره دهب ميامى اما البلطى بروح رشيد والبوصيلى واماكن تانيه كويسه 01223341946

    رد
  • ابراهيم سالم

    معلهش بعض هذه المعلومات غير صحيحه لأن الذي يقول بأن خلف مطار النزهة بالاسكندرية ترعة العفاريتي هذه المياه ىانقرضت من اربعين سنة عايزين اللي يدلنا على ميه تكون مضمونة وفيها سمك نعرف نصطاد منها ونمتع نفسنا في الصيد

    رد
  • محمد سيد

    السلام عليكم ورحمة الله.. اخواتى الصيادين بالنسبه للمناشى والقناطر السمك فيها مابقاش كتير زى زمان مفيش غير الانوم وده بيطلع كتير منه انا من ساعة ثورة يناير وانا بصطاد هناك وجربت كل الادوار هناك مابقتش زى الاول.. ارجو التواصل لمحبى الصيد ونطلع نصطاد جماعى

    رد

اكتب تعليق

الصعود لأعلى